Azərbaycanda irimiqyaslı təmizlik aksiyası təşkil edilib

Tarix : 2019/06/08 20:12     Kateqoriya : SOSİAL    


	Azərbaycanda irimiqyaslı təmizlik aksiyası təşkil edilib

İyunun 8-də IDEA İctimai Birliyi, Azərbaycan Respublikası Ekologiya və Təbii Sərvətlər Nazirliyi, Azərbaycan Respublikasının Gənclər Fondu, “Təmiz Şəhər” ASC, Bakı Nəqliyyat Agentliyi və Birləşmiş Millətlər Təşkilatının Azərbaycan Nümayəndəliyinin birgə təşkilatçılığı ilə ölkəmizdə irimiqyaslı təmizlik aksiyası keçirilib.

Birlikdən “Faktat.az”-a verilən məlumata görə, Ümumdünya Ətraf Mühit Gününə həsr edilən, eyni zamanda, çimərlik mövsümünün başlanması ilə əlaqədar təşkil edilən növbəti ənənəvi sahilyanı təmizlik aksiyası Novxanı çimərliyi ərazisində təşkil olunub.

Sözügedən aksiyaya ali və orta təhsil müəssisələrinin tələbələri, gənclər təşkilatlarının fəal üzvləri və ictimaiyyət nümayəndələri olmaqla ümumilikdə 1000-ə yaxın könüllü gənc qoşulub.

Tədbirin əsas məqsədi dəniz sahillərində təmizliyə riayət olunmasını təbliğ etmək, sahilyanı ərazilərin məişət tullantıları ilə zibillənməsinin qarşısını almaq və bütün gəncləri dəniz ətraf mühitinin mühafizəsi uğrunda mübarizəyə cəlb etməkdir.

Aksiya zamanı zəruri sanitar ləvazimatlarla təmin olunmuş iştirakçılar çimərlikdən topladıqları tullantıları birgə çeşidləyərək çimərliklərdə ən çox müşahidə olunan zibilləri müəyyən ediblər. Tullantıların toplanması prosesini daha effektiv təşkil etmək məqsədilə əraziyə xüsusi texnika da cəlb olunub. Daha sonra, bütün tullantılar Balaxanı Bərk Məişət Tullantılarının Çeşidlənməsi Zavoduna təhvil verilib.

Tullantıların toplanmasının ardından gənclər təmizlənmiş ərazidə musiqi sədaları altında əylənərək futbol, voleybol, badminton və s. kimi idman növlərində özlərini sınayıb, eyni zamanda müsabiqə və interaktiv oyunlarda iştirak edərək hədiyyələr qazanıblar.

IDEA İctimai Birliyi yerli və beynəlxalq tərəfdaşlarla birgə mütəmadi olaraq Azərbaycan və regionun su bioresurslarının qorunub saxlanılması, artırılması və mühafizəsi məqsədilə Xəzər sahillərində, Kür və digər çaylarda təmizlik aksiyaları təşkil edir.

“Sahillər təmiz qalsın” şüarı altında keçirilən təmizlik aksiyası Xəzər dənizi sahillərində gənclərin kütləvi iştirakı ilə baş tutan sayca 13-cü aksiyadır. Bu aksiyalar çərçivəsində ümumilikdə sahillərdən 60 tona yaxın tullantı toplanaraq çeşidlənmiş və təkrar emala göndərilib.

Aksiya tərəfdaşları tədbirə qoşulan bütün təbiətsevər gənclərə təşəkkür edir, hər kəsi Planetimizi çirkləndirməməyə və ətraf mühitin qayğısına qalmağa çağırır!