Rafael Cəbrayılov Azərbaycan xalqından üzr istəyərək mandatından imtina etdi

Tarix : 2019/09/30 12:42     Kateqoriya : PARLAMENT    


	Rafael Cəbrayılov Azərbaycan xalqından üzr istəyərək mandatından imtina etdi

Adı borc və deputatlıq vəsiqəsinin girov qoyulması qalmaqalında  hallanan millət vəkili Rafael Cəbrayılov parlamentin payız sessiyasının bu gün öz işinə başlayan ilk plenar toplantısının səhər iclasına qatılmadı.

"FaktAT.az"-ın xəbərinə görə, belə ki,  məlum qalmaqaldan sonra R. Cəbrayılovun deputatlıq səlahiyyətinin ləğv olunacağı yönündə fikirlər və çağırışlar səslənirdi.
 
Bir çox deputatlar, hakim Yeni Azərbaycan Partiyasından (YAP) olan parlamentarilər R. Cəbrayılovu istefa verməyə səsləyirdi.
 
Bu səbəbdən də, millət vəkilinin özünün könüllü şəkildə istefa verəcəyi gözlənilirdi.
 
Deputatın iclasa qatılmaması isə bu ehtimalı daha da gücləndirmiş oldu.
 
***
Gözlənildiyi kimi də oldu.
 
R. Cəbrayılov özü deputat mandatından və səlahiyyətlərindən imtina etdi.
 
Bu haqda spiker Oqtay Əsədov məlumat verdi.
 
O, qeyd etdi ki, millət vəkili bununla bağlı Milli Məclisə (MM) müraciət edib.
 
Müraciəti isə MM-in Hüquq siyasəti və dövlət quruculuğu komitəsinin sədri Əli Hüseynli deputatlara çatdırdı.
 
Komitə sədri R. Cəbrayılovun Azərbaycan xalqından və seçicilərindən üzr istədiyini və könüllü şəkildə mandatından imtina etdiyini bildirdi.
 
***
 
Parlamentin İctimai birliklər və dini qurumlar komitəsinin sədri Siyavuş Novruzov isə həmkarlarını bu məsələ ətrafında müzakirə açmamağa çağırdı.
 
Komitə sədri bildirdi ki, məlum olayla bağlı R. Cəbrayılov öz könüllü addım atıb, deputat mandatından imtina edib və buna görə həmin məsələnin ətrafında geniş müzakirələrə ehtiyac yoxdur.
 
Kamil HƏMZƏOĞLU