“Əlilliyi olan şəxslər iş dünyasında” adlı tədbir keçirilir

Tarix : 2019/11/28 15:41     Kateqoriya : SOSİAL    


	“Əlilliyi olan şəxslər iş dünyasında” adlı tədbir keçirilir

Əmək və Əhalinin Sosial Müdafiəsi Nazirliyi və BP-“British Council”in birgə həyata keçirdiyi “Əlilliyi olan şəxslərin məşğulluq qabiliyyətlərinin artırılması proqramı” çərçivəsində nazirliyin, işəgötürənlərin, o cümlədən biznes strukturlarının, digər maraqlı tərəflərin nümayəndələrinin, əlilliyi olan şəxslərin iştirakı ilə “Əlilliyi olan şəxslər iş dünyasında” adlı tədbir keçirilir.

Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən “Faktat.az”-a verilən məlumata görə, tədbirdə “British Council” təşkilatının Azərbaycan üzrə rəhbəri Samr Şah təşkilatın həssas qruplarla bağlı layihələrini qeyd edib, əlilliyi olan şəxslərin məşğulluq imkanlarının dəstəklənməsinin diqqətdə saxlanan iş istiqamətlərindən olduğunu bildirib. Böyük Britaniyanın Azərbaycandakı səfiri Ceyms Şarp BP-“British Council”in sosial önəm kəsb edən layihələrindən bəhs edib, o cümlədən “Əlilliyi olan şəxslərin məşğulluq qabiliyyətlərinin artırılması proqramı”nın önəmini diqqətə çatdırıb.

Əmək və Əhalinin Sosial Müdafiəsi nazirinin müavini Anar Kərimov əlilliyi olan şəxslərlə bağlı milli qanunvericiliyin BMT-nin “Əlilliyi olan şəxslərin hüquqları haqqında” Konvensiyasına və mütərəqqi beynəlxalq təcrübəyə uyğunlaşdırılması məqsədilə aparılan işləri diqqətə çatdırıb, ötən ilin may ayında “Əlilliyi olan şəxslərin hüquqları haqqında" Qanunun qəbul edildiyini deyib. Yeni qanunun qəbulu ilə əlaqədar hazırlanan müvafiq layihələri, əlilliyin müəyyən olunması sahəsində yeni meyarları, yeni “Reabilitasiya Konsepsiyası” sənədinin layihəsinin hazırlanmaqda olduğunu, Almaniyanın Bədbəxt Hadisələrdən Sığorta Agentliyi ilə bu istiqamətdə əməkdaşlıq həyata keçirildiyini deyib. Həmçinin “İnfrastruktur obyektlərinin əlilliyi olan şəxslərin istifadəsi üçün ağlabatan uyğunlaşdırılması Qaydası” layihəsinin hazırlandığını bildirib.

Nazir müavini əlillik və tibbi-sosial reabilitasiya sahəsində aparılan islahatlardan bəhs edib. O, əlilliyi olan şəxslərin məşğulluq imkanlarının artırılması sahəsində də məqsədyönlü işlərin aparıldığını vurğulayıb. Bildirib ki, 2019–2030-cu illər üçün Məşğulluq Strategiyasında əlilliyi olan şəxslərə xüsusi məşğulluq xidmətlərinin təqdim edilməsi üçün müvafiq infrastrukturun yaradılması və peşə reabilitasiya mərkəzləri şəbəkəsinin genişləndirilməsi nəzərdə tutulur. Nazirlik və BMT-nin İnkişaf Proqramının birgə layihəsi çərçivəsində 500 nəfər əlilliyi olan şəxsin dayanıqlı biznes qurmaları üçün işlərin aparılır.

A.Kərimov Əmək və Əhalinin Sosial Müdafiəsi Nazirliyi və BP-“British Council”in birgə həyata keçirdiyi “Əlilliyi olan şəxslərin məşğulluq qabiliyyətlərinin artırılması proqramı”nın həmin şəxslərin əmək bazarına çıxışının dəstəklənməsi sahəsində əhəmiyyətindən bəhs edib.

Sonra “Əlilliyi olan şəxslərin məşğulluq qabiliyyətlərinin artırılması layihəsi” təqdim edilib. Qeyd edilib ki, bu layihənin əsas məqsədi əlilliyi olan şəxslərin əmək bazarına inteqrasiyası, onların məşğulluğunun, peşə və sosial reabilitasiyasının təmin edilməsindən ibarətdir. Layihə üzrə ötən il 100 nəfər əlilliyi olan şəxsə ingilis dili, kompüter, sosial bacarıqlar və xüsusi iş sahələri üzrə təlimlər keçirilib, sonda əmək yarmarkası təşkil olunub. Cari ildə də daha 100 nəfər əlilliyi olan şəxs layihəyə cəlb olunub.

Layihənin uğurlu icrasını təmin etmək məqsədi ilə Azərbaycana dəvət olunan Böyük Britaniya eksperti Mark Qrey əlilliyi olan şəxslərin məşğulluğunun təminatı sahəsində Birləşmiş Krallığın təcrübələri barədə məlumat verib.

Tədbirdə həmçinin BP-nin əlilliyi olan şəxslərin işə götürülməsi haqqında təcrübələri, təcrübə (Internship) proqramı barədə təqdimatın edilməsi, əlilliyi olan şəxslərin uğur hekayələrini bölüşməsi, əlilliyi olan şəxslərin məşğulluğunun təminatına, onların bacarıq və qabiliyyətlərindən istifadəyə işəgötürənlərin diqqətinin artırılması ilə bağlı müzakirələrin aparılması nəzərdə tutulub.