Bakıda Bolqarıstanın Azadlıq Günü qeyd edildi

Tarix : 2020/03/03 20:35     Kateqoriya : SİYASƏT    


	Bakıda Bolqarıstanın Azadlıq Günü qeyd edildi

Bolqarıstanın ölkəmizdəki səfirliyi Azadlıq Günü münasibətilə dövlət və hökumət rəsmilərinin, diplomatik korpusun, ictimaiyyət nümayəndələrinin iştirakı ilə rəsmi qəbul təşkil edib.

Öncə hər iki ölkənin dövlət himni səsləndirilib. Sonra çıxış edən Bolqarıstanın Azərbaycandakı səfiri Nikolay Yankov ölkəsinin müstəqillik yolundan söz açıb. Deyib ki, 1339 ildir ki, ölkəsi enişli-çıxışlı yol qətt edib.  Bolqarıstanın tarixindən danışıb, hazırda müasir və çiçəklənən ölkə statusu qazananadək keçdiyi şərəfli tarixindən qürur duyduqlarını deyib.

"Azərbaycanla Bolqarıstan arasında enerji sahəsində strateji əməkdaşlıq tezliklə öz nəticəsini göstərəcək. Belə ki, bu ilin sonuna kimi Azərbaycanın təbii qazı Bolqarıstana nəql edilməyə başlanacaq. Bolqarıstan Azərbaycanı Cənub Qaz Dəhlizi layihəsinin həyata keçirilməsində əsas aparıcı qüvvə hesab edir və bu, təkcə ölkəmiz üçün deyil, həm də Avropa üçün təbii qaz təchizatı mənbələri və marşurutlarının diversifikasiyasında mühüm rol oynayır” deyən diplomat əlavə edib ki, həm Bolqarıstan, həm də Azərbaycan artıq mövcud olan mükəmməl siyasi əlaqələrimizi, səmərəli münasibətlərimizi iki ölkənin vətəndaşları üçün əhəmiyyətli nəticələrə gətirmək naminə böyük səylə çalışır. Ticarət və iqtisadi, turizm, humanitar sahələrdə, xalqlarımızın əlaqələrində tamamlanması gərəkən böyük potensial var.

Səfir deyib ki, Bolqarıstan bütün qonşuları ilə mehriban münasibətləri inkişaf etdirir: “Bolqarıstan bizə ortaq dəyərlər, iqtisadi rifah, mədəni müxtəliflilik məkanının bir hissəsi olmaq imkanı verən Avropa İttifaqının üzvüdür. Eyni zamanda, NATO-nun sadiq üzvü olmaqla, təhlükəsizlik, sabitlik və sülhün bərqərar olması üçün beynəlxalq və regionla əməkdaşlığı inkişaf etdirir”.

Səfir Yankovun sözlərinə görə, Azərbaycanla diplomatik əlaqələr 1992-ci ildə qurulub, lakin iki ölkənin xalqları arasında dostluq və əməkdaşlığın tarixi çox qədimlərə dayanır. “Bu gün biz yaxın və dost münasibətlərdən, dinamik yüksək səviyyəli siyasi dialoqdan, getdikcə inkişaf edən ikitərəfli əməkdaşlıqdan məmnunluq duyuruq. 2015-ci ildə Strateji Əməkdaşlıq üzrə birgə bəyannamə imzalanıb. Bu il ölkələrimiz arasında strateji əməkdaşlığın beşinci ildönümü qeyd olunur. O vaxtdan bəri Bolqarıstan-Azərbaycan münasibətləri daha da genişlənib və güclənib”. Səfir xatırladıb ki, keçən il Bolqarıstanın Baş Nazirinin, parlament spikerinin, Xarici İşlər, Energetika, Mədəniyyət, Əmək naziri, Daxili İşlər nazirlərinin və digər rəsmilərin Bakıya çox uğurlu səfərləri olub: “Bu il də Bakıda və Sofiyada çox fəal, səmərəli ikitərəfli səfərlərin və görüşlərin, eləcə də İqtisadi Əməkdaşlıq üzrə hökumətlərarası birgə komissiyanın altıncı iclasının keçirilməsi planlaşdırılır”.

Kənd Təsərrüfatı naziri İnam Kərimov bildirib ki, son 28 il ərzində ikitərəfli əlaqələr yüksələn xətt üzrə inkişaf edib. Bu da ölkələrimizin yerləşdiyi bütün bölgələrin xeyrinədir. "Qarşılıqlı əməkdaşlıq hər iki ölkə rəhbərlərinin səyləri nəticəsində daha da genişlənir və strateji müstəviyə qalxıb. Prezident İlham Əliyevin 2015-ci ildə Bolqarıstana səfəri zamanı imzaladığı müqavilə də münasibətlərin inkişafına təkan verib. Hökumətlərarası komissiyanın iclasları da münasibətimizdə böyük rol oynayır. Hazırda Bakı ilə Sofiya arasında birbaşa hava reysi vardır ki, bu da turistlərin gediş-gəlişinə münbit şərait yaradır", – deyən nazir əlavə edib ki, hazırda ölkələrimiz enerji sahəsində də yaxından əməkdaşlıq etməkdədir.

Bu yerdə qeyd edək ki, azərbaycanla Bolqarıstan arasında münasibətlərin kökü çox qədimdir. Hər zaman, hətta sovet dönəmində də xaqlarımız arasında gediş-gəliş olub.

Bolqarıstan Azərbaycanın müstəqilliyini 14 yanvar 1992-ci ildə tanıyıb. İki ölkə arasında diplomatik əlaqələr isə 1992-ci il iyun ayının 5-də qurulub.

Hazırda Azərbaycanın Bolqarıstandakı səfiri Nərgiz Qurbanova, Bolqarıstanın ölkəmizdə səfiri Nikolay Yankovdur.

1999-cu ildə dekabr ayında Bolqarıstanın Azərbaycanda səfirliyi fəaliyyətə başlayıb. 16 aprel 2004-cü ildə isə Prezident İlham Əliyev Bolqarıstanda Azərbaycan səfirliyinin açılması haqqında sərəncam imzalayıb.

Bu gün Milli Məclisdə Azərbaycan - Bolqarıstan parlamentlərarası əlaqələr üzrə işçi qrup fəaliyyət göstərir. Bu işçi qrup 5 dekabr 2000-ci il tarixində yaradılıb və ilk rəhbəri Əli Hüseynov olub. Hazırda qrupa Rauf Əliyev rəhbərlik edir.

Azərbaycanla Bolqarıstan arasında münasibətlər strateji tərəfdaşlıq xarakteri daşıyır. Ölkələrimiz həm ikitərəfli, həm də beynəlxalq təşkilatlar çərçivəsində səmərəli əməkdaşlıq edirlər. Rəsmi Sofiyanın Yunanıstan - Bolqarıstan İnterkonnektoru vasitəsilə Cənubi Qaz Dəhlizi layihəsinə qoşulmasının ölkələrimiz arasındakı ikitərəfli əməkdaşlığın daha da inkişafına töhfə verməkdədir. Bolqarıstan ilk gündən Qarabağ münaqişəsinin həllində Azərbaycanın ədalətli mövqeyini dəstəkləməkdədir. Bu gün Azərbaycanla Bolqarıstan arasında möhkəm müqavilə-hüquq bazası yaradılıb, investisiyaların qorunması, ikiqat vergitutmanın aradan qaldırılması, nəqliyyat,  gömrük, turizm və digər sahələrdə 80-dən çox sənəd imzalanıb. Bu müstəvidə, 2015-ci ildə imzalanmış Azərbaycanla Bolqarıstan arasında strateji tərəfdaşlıq haqqında Birgə Bəyannamə iki ölkə arasında əməkdaşlığın genişlənməsində xüsusi önəm daşıyır.

Hazırda Azərbaycanda Bolqarıstan sərmayəli 11 şirkət fəaliyyət göstərir. Bolqarıstana Azərbaycan ixrac missiyası təşkil edilib.

Azərbaycanla Bolqarıstan arasında iqtisadi-ticarət əlaqələrinin həcmi, rəsmi məlumatlara əsasən, 2019-cu ildə 66 milyon dollar civarənda olub.

Qeyd edək ki, iki ölkə arasında maksimum ticarət həcmi 2012-ci ildə qeydə alınıb – 624 milyon dollara yaxın.

İqtisadi əlaqələrin gələcəkdə daha da genişləndirmək üçün enerji, sənaye, kənd təsərrüfatı, nəqliyyat-tranzit, əczaçılıq, ticarət, turizm, humanitar və sair sahələrdə yaxşı imkanlar var. Azərbaycandakı sənaye parklarında tətbiq olunan güzəştlərdən Bolqarıstan sahibkarları da yararlana bilərlər.

Bundan əlavə, Azərbaycan ərazisindən keçən beynəlxalq nəqliyyat dəhlizlərindən Bolqarıstan da faydalana bilər. Bolqar iş adamları azərbaycanlı biznes nümayəndələri ilə əməkdaşlıq edə, müştərək iş qura bilərlər. Hansı ki, bolqar iş adamlarının Azərbaycanda fəaliyyət göstərməkdə və birgə müəssisələrin açılmasında maraqlı olduğunu bu ölkənin səfiri Nikolay yankov da təsdiqləyir.

 

P.S. «Fakt-Araşdırma Təhlil» AİA kollektivi olaraq Bolqarıstanın ölkəmizdəki səfiri Nikolay Yankov başda olmaqla, səfirliyin bütün diplomatlarını təbrik edirik.