ADU ilə “Birgə və Sağlam” İctimai Birliyi arasında Memorandum imzalanıb

Tarix : 2021/07/15 16:25     Kateqoriya : TƏHSİL    


	ADU ilə “Birgə və Sağlam” İctimai Birliyi arasında Memorandum imzalanıb

Azərbaycan Dillər Universiteti ilə “Birgə və Sağlam” İctimai Birliyi arasında əməkdaşlığa dair anlaşma memorandumu imzalanıb.

Universitetin İctimaiyyətlə əlaqələr şöbəsindən «Faktat.az»-a verilən məlumata görə, Memoranduma əsasən hər iki qurum yerli və beynəlxalq ekspertlərin cəlb edilməsi ilə xüsusi qayğıya ehtiyacı olan şəxslərin ailələrinə və onlarla məşğul olan mütəxəssislərin bilik və bacarıqlarının artırılması istiqamətində birgə təlim, seminar və vebinarlar təşkil edecəklər. Bundan başqa tərəflərin müəyyənləşdirdiyi ixtisaslarda bakalavriat və magistratura səviyyəsində təhsil alan tələbələrə buraxılış və dissertasiya işlərini hazırlamaq üçün “Birgə və Sağlam” İctimai Birliyinin tərkibindəki Autizm Bərpa Mərkəzində elmi araşdırmaların aparılmasına köməklik göstəriləcək. Eyni zamanda Azərbaycan Dillər Universitetinin müvafiq ixtisaslarında təhsil alan və gələcəkdə xüsusi qayğıya ehtiyacı olan şəxslərlə işləməyi planlaşdıran tələbələr üçün birliyin tərkibindəki bərpa mərkəzində təcrübə proqramları və təlimlər təşkil olunacaq.

ADU-nun rektoru, akademik Kamal Abdulla iki qurum arasında əsası qoyulan əməkdaşlığı yüksək qiymətləndirib. Rektor bildirib ki, hər iki tərəfin bir-birindən faydalanacağı böyük mənəvi dəyərlər var və Azərbaycan Dillər Universiteti Memorandumda əksini tapan məsələlərlə bağlı bütün istiqamətlərdə öz davamlı dəstəyini göstərəcək.

“Birgə və Sağlam” İctimai Birliyinin rəhbəri Aytən Eynalova rəhbərlik etdiyi təşkilatın fəaliyyəti, istiqamətləri və layihələri haqqında ətraflı məlumat verib, ADU-nun rəhbərliyinə təşəkkürünü bildirib.